“عملية هوليود” فمولاي رشيد.. والبطلة الحقيقية موظفة Cash Plus!
في مشهد أقرب لفيلم كوميدي رديء الإخراج، قرر جوج ديال “عباقرة الإجرام” يدخلو لوكالة Cash Plus بحي مولاي رشيد فالدار البيضاء، وهم مقتنعين أنهم غادي يديرو “أخطر عملية سطو فالتاريخ”، لكن النهاية كانت أقرب لـ “طاكسي بيض وقف فالضو حمر” .
المساخط دخلو بثقة زايدة، يمكن حافظين بزاف ديال أفلام العصابات، وظنو أن الخطة محكمة وماكاين غير “سير واجي”. لكن لي ما داروش فالحساب هو أن الباب يمكن يتسد عليهم بحال علبة سردين، وأن البوليس المغربي ماشي كيحتاج نهاية الموسم باش يشد المجرمين .
الموظفة المسكينة، لي كانت خدامة غير على رزقها، تلقات راسها وسط فيلم أكشن مجاني، والرعب خلاها تتخلع بزاف حتى سخفات. والحمد لله على سلامتها .
أما الشفارة، فمن بعد ما كانو باغين يخرجو بالفلوس، لقّاو راسهم محاصرين كيتسناو البوليس يكمّل “السيناريو” ديال الاعتقال.
الساكنة ديال الحي تابعو الحدث بحماس كبير، شي وحدين كيصورو، وشي وحدين كيضحكو، وشي كيقول:
“هاد الجيل حتى السرقة ولاو فيها هواة!” .
وفي الأخير، خاص التحية للموظفة الشجاعة ولعناصر الأمن لي وصلو بسرعة، أما هاد الجوج ديال “نجوم السطو الفاشل”، فغالباً غادي يدوزو المونديال كامل كيتفرجو من وراء القضبان… بلا تذاكر وبلا VAR .
